كەریمۆک غەفور فیلمێکى نوێ دروست دەکات

     فیلمی (کۆڤید 69) نوێترین كارى ‎سینەماکارى کورد (کەریمۆک غەفور)ه‌ و لە چەند ڕۆژى پێشودا کاری وێنەگرتنی کۆتایی هات.
     ئەم فیلمە له‌ سیناریۆى (سەفین قانع) و نواندنی هەریەک لە (هەردێ سەمیر و سارا عزەت)ە و كه‌ریمۆك دەرهێنەرى فیلمەکە سه‌باره‌ت به‌م به‌رهه‌مه‌ تایبەت بە (کوردسینەما) وتی: "دەبێت دەست بۆ ئەو بابەتە هەستیارانەی ناو کۆمەڵ ببەین کە لەگەڵیدا دەژین و قسەکردن لەسەریان بڤەیە، ئەو مژارانەی بەشێک لە کۆمەڵگەی ئێمەی بەخۆوە سەرقاڵ کردووە و نابنە سەرچاوەی فیلم و تێکستی ئەدەبی، ئیشکردن لەسەر ئەم بابەتانە هەم بوێری دەوێ و هەم هەستیاری، بوێری بەو مانایەی کۆمەڵگە خۆی لەباسکردنیان دەبوێری و ترسی گەورەی هەیە ببنە بابەتی وتووێژ، بۆیە وەک پشیلە هەر خەریکی شاردنەوەی ئەم پاشەڕۆیانەن، لە ئەنجامدا بە چەندین شێوازی ناسروشتی و نەشیاو هەندێ جاریش تاوان بەدیار دەکەون".
‎     لە کۆتایی قسەکانیدا ئەو دەرهێنەرە وتی: "من لە فیلمی (کۆڤید 69) دا، ئەم جۆرە پەیوەندییانە بە نەخۆشی ناو دەبم، ڕێک وایە کە چاودێری و ترس و تۆقین تێکەڵی پەیوەندییەکان بوو، کارەکتەرەکان سروشتیانە مامەڵە ناکەن، ئیدی نەخۆشییەک دەرونی مرۆڤەکان لە بارێکی نا ئارام و نا ئاسایی دەهێڵێتەوە و دەبێتە هۆکاری چەندین گرفتی کۆمەڵایەتی، کە ڕۆژانە لە میدیاکانەوە دەیبیستین و دەیبینین".